Yerli, yoxsa xarici mütəxəssis? - AFFA-nın baş katibi CAVABLANDIRDI

Sportlife.az xəbər verir ki,AFFA-nın baş katibi Elxan Məmmədov millinin sabiq baş məşqçisi Robert Prosineçki ilə müqavilənin uzadılmamasının səbəbləri və digər məsələlərə aydınlıq gətirib.

Azərbaycan millisinin baş məşqçisi Robert Prosineçki ilə müqavilənin uzadılmamasına səbəb nə oldu?
- AFFA-nın prezidenti Rövnəq Abdullayevlə Robert Prosineçki arasında görüş oldu. Azərbaycan futbolunun hazırki vəziyyəti və gələcək perspektivləri geniş müzakirə edildi. Müzakirələr zamanı gördük ki, Prosineçki müqaviləni uzatmağa həvəsli deyil. Elə bizim tərəfdən də mövqe eyni idi.

AFFA-nın müqaviləni uzatmaqda həvəsli olmamasının səbəbi nə idi?
- Biz ilk növbədə, onu dinləməli idik. Çünki milli komandanın başında o durur. Prosineçkini dinlədikdən sonra müzakirə nəticəsində belə bir nəticəyə gəldik. Hər halda, hər iki tərəfin də böyük arzusu olsaydı, yəqin ki, müqavilə uzadılardı.

Prosineçki müqaviləni uzatmaq istəməməsini nə ilə əlaqələndirirdi?
- O barədə müzakirələr aparılmadı, səbəblər olmadı. Ona görə də biz AFFA-nın rəsmi saytında qısa və konkret yazmışıq.

Siz həmişə açıqlamalarınızda baş məşqçinin işindən razılıq ifadə edirdiniz. Necə oldu ki, müqaviləni uzatmamağı məqsədəuyğun saydınız?
- Dünya çempionatının seçmə qrup mərhələsinə yaxşı başlamışdıq. 3 oyundan sonra 7 xalla 2-ci pillədə gedirdik. Qazandığımız xalların bizə final mərhələsinə vəsiqə şansı verə biləcəyini nəzərə alaraq, ümidlərimiz və gözləntilərimiz artmışdı. Sonrakı görüşlərdə uğurlu nəticələrin davamı, demək olar ki, gəlmədi və yekunda 5-ci yeri tutduq. Hərçənd, hədəfimiz bu yox, daha yaxşı nəticə göstərmək idi. Amma rəqəmləri pozmaq olmaz. Statistika göstərir ki, milli komanda Azərbaycan futbolu tarixində ən yaxşı nəticə göstərdi. Rəsmi açıqlamada qeyd olunduğu kimi, AFFA-nın prezidenti baş məşqçiyə "çox sağ ol" dedi. Düşünürük ki, Prosineçki Azərbaycan futboluna müsbət töhfələr verdi. Biz bunu unutmayacağıq.

Doğrudanmı Prosineçkiyə çoxlu təkliflər var, yoxsa o, şəxsi səbəblərə görə müqaviləsini uzatmaq istəmədi?
- Düşünürəm ki, ona təkliflər var. Hələ milli komandada çalışdığı vaxt da çoxlu təkliflər alırdı. Cavan, yaxşı və təcrübəli mütəxəssisdir. Fikrimcə, dərhal iş tapması problem olmayacaq.

Onun millidən ayrılmasında maliyyə məsələsi rol oynamadı?
- Maliyyə məsələləri ümumiyyətlə müzakirə olunmadı.

Prosineçki övladının təhsilinə görə burada qalmaq istədiyini söyləyirdi...
- Bu barədə onun özü ilə danışmaq daha yaxşı olardı. Prosineçki ilin sonuna kimi burada olacaq. Biz açıqlamışıq ki, müqaviləsi uzadılmayacaq. Hazırkı sözləşməsi ilin sonunda bitir. Ona görə hələlik Bakıda olacaq. Oyunlarda da onu görə bilərsiniz. Bu, elə bir məsələdir ki, biz gələcək planlarımızı açıqladıq. Baş məşqçiyə imkan yaratdıq ki, təklifləri rahat dəyərləndirsin. Klublarla və ya milli komandalarla danışıqlıqlar aparsın.

Baş məşqçinin qalan bir ayının təzminatı ödəniləcək, yoxsa o, bu gündən azaddır?
- Əlbəttə, yox. Onun ilin sonuna kimi müqaviləsi var. Müqavilə uzadılmayacaq.
 

Deməli, istəsəniz, noyabrda Prosineçkinin rəhbərliyi altında yoldaşlıq matçı keçirə bilərsiniz...
- Çox güman ki, yoldaşlıq oyunu olmayacaq. Çünki onsuz da planda yox idi. Biz bunu bir neçə ay bundan öncə elan etmişdik. Lakin Prosineçkini daxili çempionat oyunlarında görə biləcəksiniz və biz də hələ ki, iş birliyimizi davam etdiririk.

İş birliyiniz nədən ibarət ola bilər?
- Hansısa futbolçulara baxa, yeni tövsiyələr verə və gələcək üçün hansısa layihəni təqdim edə bilər. Biz yalnız müqaviləni uzatmırıq. Yoldaşlıq oyunu olsaydı, həmin görüşdə baş məşqçi vəzifəsini yerinə yetirəcəkdi.

İndi əsas məsələ milliyə kimin gələcəyidir. Yerli, yoxsa xarici mütəxəssis?
- Bu barədə heç nə deyə bilmərəm.

Yəqin ki, siz Prosineçkinin gedəcəyini bilirdiniz. Vaxt azdır və müəyyən seçimlər etmək lazımdır. Fevrala kimi yoldaşlıq matçı, təlim məşq toplanışı olmalıdır...
- Vaxt az deyil. Kifayət qədər vaxtımız var. Biz tələsmirik. İlin sonuna kimi vaxtımız var.

Yeni baş məşqçi ilin sonunadək təyin olunacaq?
- Bəli.

Ertuğrul Sağlamın milli komandaya gəlişi real görünür?
- Düzü, o, namizədlər siyahısında yoxdu. Bilirəm ki, bir müddət əvvəl Bakıya gəlmişdi. Lakin onunla görüşümüz olmayıb. Amma görüşmək istərdim. Bir peşəkar kimi ona həmişə böyük hörmətim olub. Sadəcə, həmin gün Çexiyaya qarşı oyunumuzla bağlı məşğul idim. Stadionda mütləq yaxınlaşıb onunla görüşərdim. Lakin oyun zamanı görüşmək çətindir. Stadion da çox böyükdür. Tribunadakı bir "skayboks"dan digərinə getmək üçün kifayət qədər vaxt lazımdır. Bir tərəfdən də düşünürəm ki, yaxşı ki, görüşmədik. Görüşsəydik, fikirləşəcəkdiniz ki, yüz faiz danışıqlıqlara başlayıblar.

Özü Rəşad Sadıqovun oyununu izləməyə gəldiyini desə, futbolçu sabiq baş məşqçisi ilə görüşə bilmədiyini deyir. Siz də Sağlamı görə bilməmisiniz. Elə isə türkiyəli mütəxəssis Bakıda kiminlə görüşüb?
- Yəqin ki, futbolçulara baxmağa gəlmişdi. Bizimlə görüşməyibsə, ola bilsin, gələcəkdə öz komandasında görmək istədiyi oyunçuları yaxından izləmək istəyib (report).