Robert PROSİNEÇKİ: Bu məsələni Avstriyada yoluna qoymağa çalışacağıq
Azərbaycan yığmasının baş məşqçisi Robert Prosineçki Əlcəzairlə oyunun fasiləsində jurnalistlərin suallarını cavablandırıb.
Sportlife.az həmin müsahibəni təqdim edir:
- Millimizin Bakıdakı toplanışı barədə nə deyə bilərsiz?
- Hələlik, hazırlığımız tam heyətlə getmir. Hazırlığın ilk günləri yaxşı keçir. Komanda üzvlərinin məşqlərdə həvəsli olmasını xüsusi qeyd edərdim. Ancaq hazırlığın əsas mərhələsi Avstriyada başlayacaq. Ora artıq tam heyətlə yollanacağıq.
- Millimiz Avstriyada iki yoxlama oyunu keçirməlidi, amma hələ rəqiblər bəlli deyil...
- Bəli, iki yoxlama oyunu keçirməyi planlaşdırırıq. Bu məsələni orada yerində yoluna qoymağa çalışacağıq.
- Millimizlə oynamaq istəyən komanda yoxdu, yoxsa sizin oynamaq istədiyiniz komanda tapılmır?
- Hər komanda ilə qarşılaşmaq olmur. İstədiyimiz komandalar da Avstriyada olmayacaq. Bu il oraya az komanda gələcək.
- Rəşad Sadıqovun zədəsi nə dərəcədə ciddidir?
- Bilmirəm. Avstriyada ümumi kollektivlə məşq edəcəyinə ümid edirəm.
- Premyer Liqa çox erkən başa çatdı. Bəzi futbolçular İslamiadada çıxış edir, bəziləri yenicə məşqlərə başlayır. Bu, Şimali İrlandiya ilə oyun öncəsi problem yarada bilər?
- Legionerlər öz çempionatlarında çıxışlarını davam etdirirlər. "Qarabağ" və "Qəbələ" də mövsümü o qədər də tez başa vurmadı. Buna görə də problem yaranacağını düşünmürəm.
- U-23 millimizin İslamiadadakı çıxışını necə dəyərləndirərdiniz? Komandamız bu turniri qalib kimi başa vura bilər?
- Hər şey mümkündü. Komanda heç də pis təsir bağışlamır, mübarizə aparır. Əlcəzairlə matçın ilk hissəsindən razı qaldım. Finala çıxmaq çətin görünür. Əlcəzair çox güclü komandadı.
- Bəs sizin yetirmələriniz niyə Əlcəzairlə oyuna baxmağa gəlməyiblər?
- İstəmədim planlarımızı korlayaq. Onlar oyuna televizordan baxırlar. saat 5-də məşqimiz var. Qoy dincəlsinlər.
(futbolinfo.az)
