Faiq Qarayev: Onlara kömək etməliyik

Faiq Qarayev: Onlara kömək etməliyik

  • 12 Yanvar 2018, 17:07

Azərbaycan Voleybol Federasiyasının (AVF) I vitse-prezidenti, qadınlardan ibarət milli komandanın baş məşqçisi Faiq Qarayev Famil Ağayevin "Azərreyl" klubunun sükanı arxasından kənarlaşdırılacağına dair iddialara reaksiya verib. Sportlife.az xəbər verir ki, təcrübəli mütəxəssis federasiyanın mətbuat xidmətinə açıqlamasında gənclərə dəstək olmalarının vacibliyini vurğulayıb.

O, əvvəlcə "Azərreyl"in Çağırış Kubokundakı çıxışına münasibət bildirib: "Bakıdakı cavab görüşünü arenadan oyunu canlı izləyirdim. Qızlar 3 hissədə qalib gəldilər. Bacardıqları qədər mübarizə apardılar. Oyunun taleyi isə "qızıl set”də həll olundu. "Qızıl set"ə "Azərreyl" üstün başlasa da, təəssüf ki, üstünlük bizdə olduğu halda, uduzduq. Düşünürəm ki, oyunçular setin sonlarında psixoloji cəhətdən məğlub oldular. Bu da ümumi hesabda məğlubiyyətə səbəb oldu".

Qarayevin fikrincə, daha bir səbəb "Azərreyl"in komanda şəklində az oyun keçirməsidir: "Milli çempionatımız dekabrın sonlarında start götürdü. "Azərreyl" bu günədək az oyun keçirmişdi. Hansı ki, digər komandalar bu günə kimi artıq 15-dən çox oyun keçirib. Məncə, "Azərreyl"in belə çıxışına komanda şəklində az oyun oynaması da böyük təsir göstərir. Amma buna görə oyunçuları və ya məşqçini günahlandırmaq doğru olmaz".

AVF rəsmisi Ağayevi gənc və yaxşı məşqçi adlandırıb: "Famil milli komandada da mənim köməkçim olaraq çalışıb və yenə də çalışacaq. Onun kimi gənc məşqçilərimiz o qədər də çox deyil. Biz onlara öz işlərində köməklik etməliyik ki, klublarında və ya milli komandalarda yaxşı nəticələr əldə etsinlər".

Qeyd edək ki, "Azərreyl" Rumıniya "Ştiinta"sı ilə 1/16 final mərhələsinin ilk görüşündə 1:3 hesabı ilə uduzsa da, cavab qarşılaşmasında 3 setdə qələbə qazanıb - 3:0. Bu zaman, qaydalara əsasən, "qızıl set" təyin olunub və qələbəni "Ştiinta" əldə edib - 15:13.


Paylaş: