Kurban Berdiyev: "İki xal itirdik"
Azərbaycan Premyer Liqasının XXIX turunda keçirilən “Səbail” – “Turan Tovuz” matçından (0:0) sonra qonaq komandanın baş məşqçisi Kurban Berdiyev jurnalistlərin suallarını cavablandırıb.
Sportlife.az xəbər verir ki, mütəxəssis əvvəlcə oyunla bağlı fikirlərini bölüşüb.
– Yaxşı başa düşürük ki, bu gün 2 xal itirdik. İlk hissədə ehtiyatlı oynadıq. İkinci yarıda nisbətən yaxşı oynadıq, amma qol çatışmadı.
– Son 5 oyunda 2 xal toplamısınız. Avrokuboklara yollanmaq nə dərəcədə realdır?
– Razıyam. Amma futbolçularla danışıqlar gedir. Ümid edirəm ki, bundan sonra daha yaxşı çıxış edəcəyik.
– Tural Bayramlını, deyəsən, ümumiyyətlə heyətdən silmisiniz…
– Xeyr, sadəcə həmin mövqedə rəqabət güclüdür.
– Oyundan sonra Veysəl Rzayevlə azarkeşlər arasında baş verən insident nəyə görə oldu?
– Məlumatım yoxdur.
– Anton Kraçkovskini niyə oyunlarda görmürük?
– Sırf bugünkü oyunda xəstə idi.
– Bundan əvvəlki oyunlarda da onu görmürdük. Bir səbəbi var?
– Bu, elə bir mövqedir ki, rəqabət güclüdür. Həm də legioner olması təsir edir.
– Qış transferin pəncərəsində alınan oyunçular effektiv görünmür. Bunun məsuliyyətini kim daşıyır?
– Deməzdim ki, uğursuz transferlərdir. Məsələn, Hurtado ilə Jorlaem uğurlu transferlərdir.
