AFFA Əliyar Ağayevin səhvini etiraf etdi
AFFA Hakimlər Komitəsinin sədri Frank De Bleker Azərbaycan Kubokunun yarımfinal mərhələsinin ilk oyunları çərçivəsində keçirilən “Araz-Naxçıvan” – “Qarabağ” (1:0) və “Neftçi” – “Sabah” (1:2) görüşlərindəki mübahisəli epizodları şərh edib.
Sportlife.az xəbər verir ki, belçikalı mütəxəssis bu barədə AFFA-nın rəsmi saytına açıqlama verib.
O, əvvəlcə “Araz-Naxçıvan” və “Qarabağ” komandaları arasında keçirilən matçın 24-cü dəqiqəsində yaşanan epizodla bağlı fikirlərini bildirib: “Araz-Naxçıvan”ın yerinə yetirdiyi künc zərbəsi zamanı top yaxın dirəyə tərəf ötürülür. Bu komandanın futbolçusu İssuf Paro sağ ayağı ilə topla oynayır. Onun arxasında olan “Qarabağ”ın oyunçusu Yassin Benzia toxunmadan rəqibin üzvünün sağ ayağına zərbə vurur. Baş hakim oyunu davam etdirir. VAR müdaxilə edərək, baş hakimi epizodu izləməyə dəvət edir. Təkrar görüntülərə baxdıqdan sonra hakim “Araz-Naxçıvan”ın lehinə penalti təyin edir. Hakimin penalti qərarı doğrudur”.
Onun sözlərinə görə, “Neftçi” – “Sabah” görüşün 19-cu dəqiqəsində verilən penalti qərarı doğrudur: “Sabah”ın futbolçusu Tellur Mütəllimov cərimə meydanında “Neftçi”nin oyunçusunun Ağadadaş Salyanskinin ayağına arxadan zərbə endirdi. Hakimin penalti qərarını dəstəkləyirəm”.
De Bleker həmin görüşün 90+1-ci dəqiqədə Mikels və Matiasın arasında olan epizodda baş hakim Əliyar Ağayevin penalti və VAR-a baxmalı olduğunu deyib: “Sabah”ın hücumu zamanı top bu komandanın hücumçusu Coy Lens Mikelsə çatır. O, cərimə meydanı daxilində qapı xəttinə doğru hərəkət edir və topa zərbə vurur. Hücumçu topu vurduqdan sonra rəqibin müdafiəçisi Yuri Matias gecikərək onun ayağına təmas edir. Hakim oyunu davam etdirir və “Sabah”ın xeyrinə künc zərbəsi təyin edir. Hücumçunun ayağına təmas aşkar şəkildə görünür. Buna görə də biz penalti və VAR müdaxiləsini gözləyirdik”.
