İtaliya klubu Arda üçün təklif göndərəcək
"Milan" "Real"ın 19 yaşlı türkiyəli yarımmüdafiəçisi Arda Güləri transfer etmək niyyətindədir.
Sportlife.az xəbər verir ki, "rossoneri"lər gənc futbolçuya uzunmüddətli müqavilə təklif etməyə hazırdırlar və yay transfer pəncərəsində danışıqlara başlamaq istəyirlər. İtaliya klubu Ardanı ilk olaraq icarəyə götürmək variantını nəzərdən keçirir, ardınca isə satın alma opsiyası ilə müqavilə bağlamağı planlaşdırır.
Arda Gülerin özü isə daha çox oyun praktikasına ehtiyac duyduğunu və müntəzəm oynamaq üçün yeni imkanlara açıq olduğunu bildirib. Baş məşqçi Karlo Ançelotti isə futbolçunun potensialına inandığını və ona zamanla daha çox şans veriləcəyini vurğulayıb. Lakin "Real" rəhbərliyi futbolçunun inkişafı üçün icarə variantını nəzərdən keçirə bilər.
Transfermarkt portalına görə, Arda Gülerin bazar dəyəri 45 milyon avro təşkil edir. Cari mövsümdə o, "Real" forması ilə 23 oyunda iştirak edərək 3 qol və 5 məhsuldar ötürmə ilə yadda qalıb. Gənc futbolçunun "kral klubu" ilə müqaviləsi 2029-cu ilə qədər qüvvədədir.
