Fərəcullayevin yüksəlişi, Hacıyevin ofsayda salınması
Tovuz şəhər stadionunda yeni inşa olunmuş əsas korpus binasının açılışı AFFA rəhbərliyindəki incə siyasi balansı və strateji dəyişiklikləri daha aydın ortaya qoydu. Tədbirdə yalnız AFFA-nın baş katibi Cahangir Fərəcullayevin iştirakı qurum daxilindəki güc mübarizələrinə işarədir.
Əvvəllər bu kimi mərasimlərdə icraçı vitse-prezident Sərxan Hacıyev də iştirak edərdi. Maraqlıdır, bəs indi niyə yox idi? Kuluarlardan aldığımız məlumatlara görə, Fərəcullayevin gəlişindən sonra Sərxan Hacıyev ofsayda salınıb...
Hacıyevin tədbirdə iştirak etməməsi AFFA-da yeni struktura keçidin başladığını göstərir. Fərəcullayevin yüksəlişi ilə Sərxan Hacıyevin meydanı tərk etməsi arasında açıq bir bağlılığın olduğu sezilir. Görünən odur ki, struktur daxilində formalaşan yeni güc konfiqurasiyası artıq idarəetməyə təsir etməyə başlayıb. Hacıyevin ofsayda salınması bu konfiqurasiyanın ilk təzahürlərindən biri kimi dəyərləndirilə bilər.
Nəticə etibarilə, bu açılış AFFA rəhbərliyindəki strateji dəyişiklikləri və Azərbaycan futbolunun idarə edilməsində formalaşmaqda olan yeni nizamı simvolizə edir. Bu dəyişikliklər qurum daxilində qızğın mübarizələrin və cavabsız sualların önünü açır.
Mirələm HƏSƏNLİ
