"Nürnberq" karyeram qısa, lakin gözəl alındı"
Azərbaycan millisinin futbolçusu Mahir Emreli yollarını ayırdığı Almaniyanın "Nürnberq" klubu ilə bağlı fikirlərini bölüşüb.
Sportlife.az xəbər verir ki, 27 yaşlı hücumçu bu barədə "Bild" nəşrinə açıqlama verib.
2-ci Bundesliqanın XXXIV turunda "Ayntaxt" (Braunşveyq) komandasına qarşı görüşdə het-trik edən forvard bunları deyib: "Nürnberq" karyeram qısa, lakin çox gözəl alındı. İndi başa çatması üzücüdür. Amma bu şəkildə vidalaşa bildiyim üçün şadam".
Emreli gələcək planlarından da söz açıb: "Agentimə dedim ki, məni mövsümün sonunadək narahat etməsin. Hələ heç nə qərarlaşdırılmayıb. Son günədək bütün diqqətimi "Nürnberq"ə yönəltmək mənim üçün vacib idi".
Qeyd edək ki, mövsümün əvvəlində 2-ci Bundesliqa təmsilçisinə keçən Mahir Emrelinin müqaviləsinin müddəti uzadılmayıb. O, "Nürnberq"in heyətində çempionatda 10, ölkə kubokunda 1 qola imza atıb. Azərbaycanlı hücumçu ilə adı açıqlanmayan Bundesliqa klubunun və "Kayzerslautern"in maraqlandığı deyilir.
