AFFA Rövnəq Abdullayevsiz dönəmdə
Artıq Rövnəq Abdullayev AFFA prezidenti kimi qəbul edilmir. Xəbəriniz olsun ki, yığmanın baş məşqçi postuna namizədlərlə bağlı məsləhətləşmələr onunla yox, onun yerinə gələcək şəxslə aparılır. Heç Milan Obradoviçin U-21 yığmasına baş məşqçi təyin olunmasından da xəbəri olmayıb Rövnəq Abdullayevin. Bir sözlə, artıq AFFA Rövnəq Abdullayevsiz dönəmdədir. Onun gedəcəyinin rəsmiləşəcəyinə çox az qalıb.
Abdullayev isə təşvişdədir. Bilir ki, AFFA prezidenti postunu tərk etdikdən sonra bu illər ərzində qurumdakı bütün yeyintilər onun ayağına yazılacaq. Yazılmalıdır da. Bu məsələdə başqa günahkar axtarmağa lüzum yoxdur. Təkcə bir məsələni deyim, siz də mənimlə razılaşın. Hazırda Beynəlxalq Bankın sabiq prezidenti Cahangir Hacıyevin məhkəməsi gedir. Bu adam Azərbaycanın bank sisteminə xeyli zərə vurub. Təkcə bank sisteminəmi? Bəs futbol təsərrüfatına? Özü də futbol təsərrüfatındakı ziyanı Rövnəq Abdullayevlə müştərək vurub. UEFA-nın maliyyə yardımı ilə tikilən “Şəfa” stadionunun necə satıldığını xatırlayırsınız? Şəhərin mərkəzində yerləşən bu stadion cəmi-cümlətanı 4 milyon manata satılmışdı. Kim satmışdı? Kimə satmışdı? Rövnəq Abdulalyev Cahangir Hacıyevə satmışdı. “Şəfa” stadionun yerləşdiyi ərazini infrastruktursuz bazara çıxartsan, azı 300 milyon manata satılar. Bəs necə olurdu ki, təkcə ərazisi 300 milyon manat dəyərində olan stadion Cahangir Hacıyevə cəmisi 4 milyona satıldı? Yəqin ki, Rövnəq Abdullayev bu suala cavab verməli olacaq. Bu stadionu millinin bazasına çevirmək olardı. Bu stadionda uşaqlar üçün akademiya qurmaq olardı. Orda Azərbaycan futbolu üçün heç olmasa 11 futbolçu yetişdirmək olardı. Rövnəq Abdullayevin AFFA-ya rəhbərlik etdiyi 11 ildə bircə futbolçu da yetişmədiyini nəzərə alsaq, Azərbaycan futboluna vurulan zərərin miqdarını təsəvvür edirsiniz? Cahangir Hacıyevin bank sisteminə vurduğu zərərdən çox olar ki, az olmaz. Böyükdür, çox böyük. Bunun sorğu-sualı aparılacaq. Necə ki, indi Cahangir Hacıyevlə aparılır. Mütləq aparılacaq. Az qalıb, lap az. Azərbaycanda futbolun olacağı günə.
Natiq Muxtarlı
