Qurban Qurbanov: "Sabahkı matça tam olmasa da, hazırıq”
“Hər iki komanda üçün vacib oyundur. Aramızda xal fərqi azdır. Rəqibin baş məşqçisinin açıqlamalarını oxumuşam. Hiss olunur ki, çox ciddi hazırlaşırlar və səbrsizliklə bu oyunu gözləyirlər. Sabah bizə daha çox güc sərf etmək lazım olacaq. Səliqəli oynamaq çox vacibdir. Çalışacağıq ki, meydanı sərfəli nəticə ilə tərk edək. Sabahkı matça tam olmasa da, hazırıq”.
Sportlife.az xəbər verir ki, bu sözləri “Qarabağ”ın baş məşqçisi Qurban Qurbanov sabah oynanılacaq “Elfsborq”la matç öncəsi keçirilən mətbuat konfransında deyib.
Təcrübəli mütəxəssis heyətdəki itkilər barədə də danışıb:
“Bəli itkilərimiz var, ələlxüsus da müdafiə xəttində. Kevin Medina, Bəhlul Mustafazadə yoxdur. Bu, görünən tərəfidir. Bundan başqa bəzi oyunçuların mikro zədələri var. Bu, bizi narahat edir. Sabaha kimi vaxtımız var. Həkimlərlə məsləhətləşəndən sonra qərarımızı verəcəyik. Meydança amili də var. Süni örtük həmin zədələrə mənfi təsir edə bilər. Təcrübəli oyunçulara sahibik. Həmin mövqelərdə düzgün addımlar atmağa çalışacağıq”.
