Nadir Nəbiyev: "Turan Tovuz" azarkeşləri hər şeyin ən yaxşısına layiqdir" - MÜSAHİBƏ
Uzun illər "Turan Tovuz"da çalışdıqdan sonra klubdan ayrılan, Azərbaycan millisinin sabiq üzvü Nadir Nəbiyev Sportlife.az saytına müsahibə verib.
- Premyer Liqanın birinci turunu necə qiymətləndirirsiniz? Hansı komandalar sizi daha çox təəccübləndirdi?
Birinci tur həmişə çətin olur. Buna baxmayaraq maraqlı oyunlara şahidlik etdik. Ad çəkmək istəmirəm amma məni zəif oyunu ilə təəccübləndirən komandalar oldu.
- "Turan Tovuz"un birinci turdakı performansı haqqında nə deyə bilərsiniz? Sizcə, komanda nəyi yaxşı etdi və hansı sahələrdə inkişaf etməlidir?
İlk oyun olmağına baxmayaraq rəqibin də "Neftçi" oldugunu nəzərə alsaq, "Turan" pis oynamadı. Qol epizodlarına diqqət etsək, deyərdim ki, komanda qələbə qazanmalı idi.
Yeni mövsüm üçün Premyer Liqada hansı komandaların favorit olduğunu düşünürsünüz?
- Görünən odur ki, "Qarabağ" yenə üstün tərəf olacaq. Yeni transferlər olmasa, "Kəpəz" üçün çempionat çox çətin keçəcək. Komandanı tərk edən futbolçuların yeri ciddi şəkildə hiss olunur.
- Birinci turda yeni transferlər və gənc futbolçuların çıxışı haqqında fikirləriniz nədir?
Bəzi yeni transferlər ola bilər ki, komandalarında uyğunlaşmaqda çətinlik çəksinlər. O problem tədricən aradan qalxacaq. Ümid edirəm ki, gənc futbolçuların oynamaq şansı daha çox olar.
- Azərbaycanda futbolun inkişafı üçün hansı tədbirlər görülməlidir? Sizcə, futbolu daha da irəli aparmaq üçün nə etmək lazımdır?
Uşaq futboluna daha çox diqqət ayırmaq lazımdı. Xüsusən də futbol meydançalarına.
- Nadir bəy, bu mövsüm də klubsuz qalan futbolçular oldu. Düzdü, transfer pəncərəsi hələ açıqdır, ancaq Amil Yunanov kimi təcrübəli futbolçunun xidmətinə ehtiyac duyan klub olmadı. Bu haqda nə deyə bilərsiz?
Açığı, klubsuz qalan bəzi futbolçular diqqətimi çox çəkir. Ola bilər maliyyə şərtlərində razılıq olmadığına görə klubsuz qalıblar. Amilin belə qalması heç də yaxşı hal deyil. Onun oynamaq gücü var. Məncə Amilə güvənib şans vermək lazımdı. Onsuzda yerli hücumçularımız barmaqla sayılacaq qədərdi.
Tovuz azarkeşləri sizi unutmurlar. Onlara nə demək istəyirsiz?
"Turan Tovuz" azarkeşləri həmişə yaxşı mənada seçiliblər. Çempionat yeni başlayıb. Futbolda qələbə oldugu kimi məğlub olmaq da var. Komandaya daim dəstək lazımdı. Xüsusən də məğlub olduqda. Həmişə oldugu kimi komandanın yanında olsunlar. "Turan Tovuz" azarkeşləri hər şeyin ən yaxşısına layiqdir.
