"Berezutskini gətirmək düzgün addımdır"
"Sabah" mövsümün gedişində baş məşqçisi Krunoslav Renduliç ilə yolları ayırıb və onun yerinə Vasili Berezutskini gətirib.
"Bayquşlar" rusiyalı mütəxəssis gələndən sonra Premyer Liqada 4 oyuna 7 xal toplayıb. Komanda ölkə kubokunda isə "Turan Tovuz" səddini aşaraq 1/4 finala yüksəlib.
"Sabah"a baş məşqçi dəyişikliyinin təsiri barədə futbol eksperti Aslan Kərimov Sportlife.az-a bunları deyib:
"Tez-tez məşqçini dəyişəndə istər-istəməz komandaya təsir eləyir. Bu iki başlı məsələdir. Əgər doğru baş məşqçini seçməmisən və uzun müddət onla davam edirsənsə, işlər daha da pisləşir. Yaxşı məşqçini seçəndə isə onu bir az vaxt vermək lazımdır. Ona görə də bunun iki tərəfi var. Hesab edirəm ki, hazırki durum barədə danışası olsaq, Berezutski pis görünmür. İlk oyunlarına baxdıqda nə oynatmaq istədiyi, necə oynatmaq istədiyi, özünün davranışı ümumi olaraq hələki qənaətbəxşdir. Amma bu qısa zamanda da ona qiymət vermək düzgün olmazdı. Qış fasiləsində ediləcək transferlərdən sonra rusiyalı mütəxəssisin oyununu daha düzgün dəyərləndirmək olar. Sözün düzü fasilə də çox uzun deyil. 20 gün sonra çempionat başlayacaq. Düşünürəm ki, Berezutskini gətirmək düzgün addımdır, çünki ilk turlarda komanda pis görsənmədi. Amma yenə də tələsməməliyik. Fasilədən və yeni transferlərdən sonra onun haqqında daha dolğun fikirlərə sahib ola bilərik".
Elnur İsmayılov
