"Ya "Qarabağ" standart vəziyyətlərdə zəifdir, ya da..."
"Qarabağ" rəqibdən üstün oynadı. Təəssüf ki, ələ düşən fürsətlərdən istifadə edə bilmədilər".
Bu sözləri Sportlife.az-a açıqlamasında Azərbaycan millisinin sabiq üzvü Rahid Əmirquliyev deyib.
O, Ağdam klubunun hər üç qolu künc zərbəsindən buraxmasının məyusedici məqam olduğunu bildirib: "Burada iki sual yaranır. Ya "Qarabağ" standart vəziyyətlərdə zəifdir, ya da rəqib bunu yaxşı bacarır. Ümumi götürsək, "Qarabağ" qələbəyə layiq idi".
Vaxtilə "Qarabağ"ın formasını geyinmiş yarımmüdafiəçi sabiq komandasının Avropa Liqasının əsas mərhələsində uğursuz çıxışının səbəbini də açıqlayıb: "Bu, ilk növbədə Azərbaycan çempionatının səviyyəsinin aşağı olması ilə bağlıdır. Çünki liqamızda rəqabət aparacaq iddialı komandalar yoxdur. Bu da istər-istəməz "köhlən atlar"a mənfi təsir edir. İkinci məsələ Qurban Qurbanovun yetirmələrinin Avropa Liqasının yeni formatına tam uyğunlaşa bilməməsidir. Bir də Juninyonun yoxluğu meydanda hiss olunurdu".
