"Zirə"nin futbolçusuna görə təzminat
Ukraynanın “Veres” klubu ciddi hüquqi problemlə üzləşə bilər.
Sportlife.az yerli mətbuata istinadən xəbər verir ki, səbəb türkiyəli hücumçu Eren Aydının gözlənilmədən “Zirə”yə keçməsidir.
22 yaşlı futbolçu ötən ay Premyer Liqa təmsilçisi ilə 4 aylıq müqavilə imzalayıb. Halbuki onun “Veres”lə qüvvədə olan müqaviləsi 2028-ci ilin ortalarına qədər idi. Bu addım Ukrayna klubuna qarşı hüquqi iddiaların yaranmasına səbəb ola bilər.
Bundan əlavə, “Veres” üçün vəziyyət daha da mürəkkəbləşə bilər. Futbolçunun əvvəlki klubu “Qalatasaray” da məsələ ilə bağlı təzminat tələbi ilə məhkəməyə müraciət etməyi planlaşdırır. İddialara görə, mümkün kompensasiya məbləği 10 milyon avroya qədər çata bilər. Bu isə Ukrayna klubuna ciddi maliyyə riski yaradır.
Mövcud vəziyyət həm də Ukrayna futbolunun müharibə şəraitində üzləşdiyi çətinlikləri bir daha göstərir. Uzun müddətdir davam edən qeyri-sabitlik klubların maliyyə və infrastruktur imkanlarına mənfi təsir edir. Belə bir dövrdə Eren Aydının müqaviləni pozması kluba əlavə problem yaradır.
“Veres” rəhbərliyi hazırda öz hüquqlarını qorumaq və mümkün zərərlərin qarşısını almaq üçün bütün hüquqi addımları nəzərdən keçirir.
