Səssiz kabus: "Sumqayıt"ın çöküşü
"Sumqayıt"ın ardıcıl 8 oyunluq qələbəsizlik və qolsuzluq seriyası sadəcə meydandakı taktiki və psixoloji problemlərlə izah edilə bilməz. Bu, klubun prezidenti Riad Rəfiyevin idarəetmədə buraxdığı ciddi səhvlərin və uğursuz transfer siyasətinin nəticəsidir.
Komanda mövsümə hücum xəttində ciddi boşluqlarla başladı və Rəfiyev bunu düzəltmək əvəzinə keyfiyyətsiz və təcrübəsiz oyunçulara üstünlük verdi. Transfer siyasətindəki səhvlər komandanın qol vurmaq potensialını sıfıra endirdi. Nə fərdi ustalıq göstərə bilən, nə də oyunu dəyişə biləcək hücumçu var.
Klub rəhbərliyi uzunmüddətli planlaşdırmada zəif işləyib və böhrandan çıxmaq üçün heç bir konkret addım atmayıb. Vaqif Cavadova taktiki dəyişikliklər üçün nə lazımi dəstək verilib, nə də resurslar ayrılıb. Komanda hər oyun eyni sistemlə meydana çıxır, amma bu sistem nə müdafiəni gücləndirir, nə də hücumu dirçəldir. Büdcənin səmərəsiz idarə edilməsi də vəziyyəti daha da ağırlaşdırıb. Yanlış transferlərə xərclənən pullar nəticəsində komanda nə qol vurur, nə də qələbə qazanır. Üstəlik, uğursuzluq seriyası uzandıqca rəhbərlik motivasiya artıran heç bir tədbir görməyib və böhranı sadəcə izləməklə kifayətlənib.
Belə getsə, "Sumqayıt" tarixə ən uğursuz seriyalardan biri ilə düşəcək. Futbol strategiya, düzgün transfer siyasəti və idarəçilik tələb edir. Hazırkı vəziyyətdə isə "Sumqayıt" bu üç sahədə də iflasa uğrayıb.
Mirələm Həsənli
