Odina Bayramova: Azarkeşləri məyus etməməliyik
Voleybol üzrə Azərbaycan milli komandasının kapitanı Odina Bayramova Avropa çempionatı ilə bağlı jurnalistlərin suallarını cavablandırıb.
Sportlife.az-ın məlumatına görə, Bayramova Avropa çempionatına hazırlıq və komandanın şansları barədə danışıb:
- Yüksək səviyyədə hazırlıq keçmişik. Avropa çempionatına, qalib gəlməyə tam hazırıq. Belə yarışlarda meydan sahibi olmaq böyük şərəfdi. Biz də öz məsuliyyətimizi yaxşı dərk edirik. Azərbaycanı, xalqımızı, azarkeşlərimizi məyus etməməliyik.
- Qrupdakı rəqibləriniz haqda nə fikirləşirsən?
- Rəqib, istənilən halda rəqibdi. Zəif olmur, oynamaq lazımdı. Hamımıza uğurlar arzulayıram. Hər şey meydanda məlum olacaq.
- Sizcə, qrupda ən güclü rəqib kimdi?
- Polşa.
- Bəs Avropa çempionatının favoriti kimi sayırsınız?
- Biri elə bizik. Hazırkı Avropa çempionatına ən güclü komandalar gəlib.
- Belə olan halda, finalda hansı yığmanı rəqib görmək istərdiz?
- Rusiya, Türkiyə, Serbiya və ya İtaliya.
- Evdə oynamağın çətin tərəfləri də olur. Bunu bilirsizmi?
- Bəli. Əsas çətinlik odu ki, azarkeşləri məyus etməməliyik. Bu da əlavə gərginlik deməkdi. Düzdü, deyirlər ki, doğma divarlar da kömək edir. Bütün zal səni dəstəkləyəndə, onlar rəqibə qarşı olur.
- Amma yığmamız I Avropa Oyunlarında da doğma divarlar arasında oynasa da, azarkeşlərini üzüb. Hamı medal gözlədiyi halda, 4cü olduq...
- Bu nəticə çox ağır idi. Çünki qrupda qalmaq biabırçılıq sayılsa da, bunu tez unutmaq mümkündü. Amma 4-cü yer daha üzücü olur. Ümid edirəm ki, bu, təkrarlanmayacaq. "Bakı-2015"-i xatırlamaq belə istəmirəm.
- Yığmamız DÇ-2018-in seçmə mərhələsindəki kimi çıxış edə biləcəkmi?
- Bəli. Düşünürəm ki, belə olacaq. Bizi tətildən sonra sonra bərpa olunmaq qaldırdı. Bu gün isə komanda hazırdı.
- Zədəniz də vardı...
- Zədə həmişə problemdi. Bunun nəticəsində kifayət qədər çox sayda məşqlər buraxdım. Ümid edirəm ki, indi komandaya nə iləsə kömək edə biləcəm.
