Sxadadze: "Heç vaxt deyə bilmərəm ki..."
"Qəbələ" Azərbaycan Premyer Liqasının XIV turunun təxirə salınmış oyununda doğma meydanda "Turan Tovuz"a 0:3 hesabı ilə məğlub olub.
Sportlife.az xəbər verir ki, "qırmızı-qaralar"ın baş məşqçisi Kaxaber Sxadadze matçdan sonra keçirilən mətbuat konfransında jurnalistlərin suallarını cavablandırıb.
- Oyun haqda çox danışmayacağam. Əvvəlcə "Turan Tovuz"u təbrik edirəm. Oyuna çox pis başladıq. İlk dəqiqələrdə 2 qol buraxdıq. "Turan Tovuz" kimi təcrübəli komandaya qarşı sonradan oyunu toparlamaq çətindir. Rəqibin 2-ci qolundan sonra bir neçə fürsətimiz oldu. Təəssüf ki, onları reallaşdıra bilmədik. Fərqlənə bilsəydik, bəlkə də oyun başqa cür ola bilərdi. 2-ci hissənin əvvəlində isə öz qapımıza qol vurduq. Bundan sonra komanda istədiyi kimi oynaya bilmədi. "Turan Tovuz" müdafiədə çox diqqətli oynayır. Onların müdafiə xəttini yarmaq çox çətin olur.
- Demək olar ki, bu, "Qəbələ"nin ən zəif oyunu idi? Bəlkə "Karvan-Yevlax"la qarşıdan gələn matçın daha vacib olduğunu düşünürsünüz?
- Bizim üçün hər oyun vacibdir. Aydın məsələdir ki, "Karvan-Yevlax"la matç final kimidir. Prins Ovusu çox gəncdir. Həddindən artıq çox oynayıb. Bəzən onu da əvəzləmək lazımdır. 4 gündən bir oynayırıq. Bu da çətindir. Belə hallarda heyətdə rotasiyalar vacibdir. Bəzi futbolçular özlərini yaxşı tərəfdən göstərdi, bəziləri göstərə bilmədi. Sıx qrafikdə rotasiyalar etməliyik. Start heyətində meydana çıxanlar başa düşməlidirlər ki, özünü göstərmək lazımdır. Təəssüf ki, bəziləri göstərə bilmədilər. Bütün mövsümü 11 nəfərlə oynamaq mümkün deyil. Murad Musayev ötən matçda oynamamışdı. Halbuki komandanın kapitanıdır. Bu gün meydana çıxdı və müdafiədə komandanın ən səhvsiz oyunçularından biri idi. Hamı öz üzərində bu cür işləməlidir. Komanda 11 nəfərdən ibarət deyil. Digər futbolçular da xeyir verməlidir.
- "Karvan-Yevlax" uzun müddətdir qələbə qazana bilmir. Belə komanda ilə oyuna final deyirsiniz. Öz komandanızdan ehtiyat edirsiniz?
- Bütün rəqiblərə hörmətlə yanaşırıq. Heç vaxt deyə bilmərəm ki, biz "Karvan-Yevlax"dan güclüyük. Onlar da yaxşı komandadır. Çalışırlar, mübarizə aparırlar. Xalları az olsa da, çox ciddi oyun olacaq.
