Berdiyevin qələbə şərhi
"Turan Tovuz" Azərbaycan Premyer Liqasının XIV turundan təxirə salınmış oyunda səfərdə "Qəbələ"ni 3:0 hesabı ilə məğlub edib.
Sportlife.az xəbər verir ki, Tovuz təmsilçisinin baş məşqçisi Kurban Berdiyev matçdan sonra keçirilən mətbuat konfransında jurnalistlərin suallarını cavablandırıb.
- "Qəbələ"dən bir az ehtiyat edirdik. Onların yaxşı komanda olduğunu bilirdik. Rəqibin sürətli hücumçuları var. İşimizin öhdəsindən gəldik. Uşaqlar pis oynamadılar.
- Demək olar ki, bu gün gözlədiyiniz "Qəbələ"ni görmədiniz?
- Xeyr, necə rəqib gözləyirdiksə, onu da gördük. İlk hissədə "Qəbələ"nin kifayət qədər qol epizodları oldu. Heç bir komanda üçün onlara qarşı oynamaq asan olmayıb.
- Sanki Rəhim Sadıqovun mövqeyini dəyişmisiniz...
- Bəli, biz onunla danışdıq. Belə qərara gəldik ki, dayaq yarımmüdafiəçisi mövqeyində daha çox fayda verəcək.
- Mövsümün ilk yarısında bir çox mütəxəssis "Turan Tovuz"un baxımsız futbol oynadığını bildirirdi. Son matçlarda isə komanda artıq 20 dəqiqəyə oyunun taleyini həll edir. Nələri dəyişdiniz?
- Komanda zamanla formalaşır. Buna bir neçə il lazım olur. Hər mövsümün özünün vəzifələri var. Bu mövsümün vəzifələri ötən mövsümdən fərqlidir. Buna uyğun olaraq irəliyə doğru addımlayırıq. Bəzən nəsə alınır, bəzən alınmır. Amma uşaqlar hara getdiklərini bilirlər. Bir az vaxt lazımdır.
- Artıq "Zirə" ilə xal fərqi 5-ə yüksəldi. "Turan Tovuz"un avrokuboklar yolunda böyük addım atdığını demək olar?
- Xeyr, hələ deyə bilmərik. Ötən mövsüm bizə göstərdi ki, indidən nəsə demək tezdir. Hazırda Azərbaycan çempionatı o qədər rəqabətlidir ki, istənilən komanda digərindən xal ala bilər. Ötən mövsüm nəticələri hardasa əvvəlcədən demək olurdu. Amma bu mövsüm gözlənilməz nəticələr qeydə alınır. Azərbaycan futbolu daha da güclü olub.
