Adil Vəliyev haradadır?
Üç turda üç məğlubiyyət həm nəticə, həm də oyun baxımından "Kəpəz"in ağır durumda olduğunu göstərir. Halbuki klubdan verilən mesajlarda hədəfin daha yüksək yerlər olduğu deyilirdi. Ancaq real mənzərə tam fərqlidir. Komanda yenə də “qalmaq uğrunda mübarizə” ssenarisinə doğru sürüklənir.
Hədəfdən söz düşmüşkən, İdarə Heyətinə qısa müddət sədrlik edən Namiq Qədirov hədəflərinin sadəcə Premyer Liqada qalmaq olmayacağını demişdi. Onun gedişindən sonra postu təhvil alan Adil Vəliyev isə ortalıqda yoxdur. Klubun ən çətin dönəmində rəhbərin üzə çıxmaması, azarkeşlərə və ictimaiyyətə vəziyyətlə bağlı izah verilməməsi ən azı məsuliyyətsizlikdir. Böhran dövründə rəhbərlik ortalığa çıxmalı, həm problemləri, həm də həll yollarını açıqlamalıdır. Ümumiyyətlə Adil Vəliyev haradadır? Bu şəxs kluba necə rəhbərlik edir? Vəliyevin Gəncə təmsilçisi ilə bağlı hər hansı çıxışını, fikirlərini nə vaxt görəcəyik?
Yeni rəhbərlik sponsor xəbərləri ilə gündəmə gəlmişdi. Amma o sponsorluq nə maliyyə sabitliyi gətirdi, nə də meydandakı nəticələrə müsbət təsir göstərdi. Əksinə, “Kəpəz” hər baxımdan daha da bərbad duruma düşüb. Bütün bunlar klubdaxili qarışıqlığın, idarəçilikdəki xaosun və ümumi plansızlığın nəticəsidir.
Gəncə futbol ictimaiyyəti illərdir komandadan uğur gözləyir. Ancaq hər dəfə eyni tabloya şahidlik edilir – zəif çıxış, qeyri-sabit rəhbərlik, dağınıq struktur.
Mirələm HƏSƏNLİ
