Çexiya klubu daha bir futbolçumuzu sınayır

Çexiya klubu daha bir futbolçumuzu sınayır

  • 5 Fevral 2018, 11:27

Daha bir azərbaycanlı futbolçu Çexiyanın “Slaviya” klubunun düşərgəsinə baxışa yollanıb. Sportlife.az xəbər verir ki, söhbət “Qəbələ” Futbol Akademiyasının yetirməsi, U-17 millimizin yarımmüdafiəçisi Samir Qurbanovdan gedir.

Sözügedən futbolçu hətta Praqa təmsilçisinin U-21 komandasının “Humpoleç”ə qarşı keçirdiyi yoxlama oyununda da qüvvəsini sınayıb.

2001-ci il təvəllüdlü futbolçu “Slaviya”nın 6:0 hesabıyla qalib gəldiyi oyuna start heyətdə başlayıb. Lakin o, fasilədə əvəzlənib.

Qeyd edək ki, bu oyunda “Slaviya”nın azərbaycanlı futbolçusu Fərid Nəbiyev də iştirak edib. Ötən ildən Praqa klubunun şərəfini qoruyan futbolçumuz start heyətdə meydana çıxıb və sonadək mübarizə aparıb.

Onu da xatırladaq ki, “Slaviya” yanvar ayının əvvəlindən “Qəbələ” Futbol Akademiyasının daha iki üzvünü – Amin Seydiyevlə Rövlan Muradovu da sınaqdan keçirirdi. Hələlik, həm bu iki oyunçu, həm də Samir Qurbanovla bağlı yekun qərarın necə olacağı müəyyənləşməyib.


Paylaş: