Füzuli Məmmədov: "Fərqi azaltmalıyıq"
Azərbaycan Premyer Liqasının XXIII turunun “Karvan-Yevlax” – “Sumqayıt” oyunundan (1:1) sonra meydan sahibi komandanın baş məşqçisi Füzuli Məmmədov jurnalistlərin suallarını cavablandırıb.
Sportlife.az xəbər verir ki, mütəxəssis əvvəlcə görüşlə bağlı fikirlərini bölüşüb.
– Maraqlı oyun alındı. 2 tərəf də meydanda mübarizə apardı. Futbolçularımın döyüşkənliyi məni sevindirdi. Çox çalışırıq ki, qol buraxmayaq. Təəssüf ki, oyun ərzində rəqib çox qol epizodu yaratmadı, amma diqqətsizliyimizdən penalti qazandılar. Bizim daha yaxşı imkanlarımız var idi. Daha erkən qol vura bilərdik. Futbolçuların döyüşkənliyinə görə onlara təşəkkür etdim. Qələbəyə köklənmişdik. Futbolçular da çox istəkli idilər.
– Ardıcıl 2 oyunda xal qazandınız. Liqada qalmaq ümidləri artıb?
– Futbolçular, məşqçilər korpusu işə çox ciddi yanaşır. Bu gün də qələbəyə çox inanırdıq. Geri düşəndən sonra qələbə çətin olur. Yaxşıdır ki, ardıcıl 2 oyundur, məğlub olmuruq. Fərqi aradan qaldırmaq üçün qələbəyə ehtiyac var.
– Qarşıda “Zirə”, “Araz-Naxçıvan”, “Qarabağ” və “Kəpəz”lə görüşlər var. Bu qrafik komandaya necə təsir edəcək?
– “Araz-Naxçıvan”la burda da oynayanda pis oynamamışdıq. Sadəcə keyfiyyət matçın taleyini həll etmişdi. Oyunlara ciddi hazırlaşacağıq. “Kəpəz”lə matça qədər fərqi azaltmalıyıq. Çalışacağıq ki, qələbələr qazanaq.
– Yaxşı qapıçı komandanın yarısıdır. Sizcə, Pedro Mateuş yarıdan daha çox deyil?
– Pedro özünü yaxşı tərəfdən göstərir. Burda qapıçı məşqçisinin də işini dəyərləndirmək lazımdır. Kritik seyvlər edir, amma komandanın da əziyyətini yerə vurmaq olmaz.
– Araz Abdullayevin durumu necədir?
– Zədədən qayıdandan sonra yenidən ağrılar hiss edib. Yaxşı müalicə keçib. Komandayla 2 məşqə çıxıb. Çox çalışmalıdır ki, komandaya kömək ola bilsin.
