"Qarabağ" "Ludoqorets"i keçəcək" - MÜSAHİBƏ
Bolqarıstanın "Arda" klubunda forma geyinən Cəlal Hüseynov Sportlife.az saytına müsahibə verib
- "Qarabağ"ın evdəki məğlubiyyətindən sonra Bolqarıstanda revanş almaq üçün şanslarını necə dəyərləndirirsən?
Şansları yarı-yarıya dəyərləndirirəm. "Ludoqorets" Bakıda qələbə qazansa da, hələ heç nə bitməyib. "Qarabağ"ın növbəti mərhələyə yüksələ biləcəyini düşünürəm. Çünki təmsilçimiz rəqibdən daha səviyyəli komandadır. Bu gün Ağdam təmsilçisi səfərdə oynasa da, "Ludoqorets"i keçəcək.
- "Ludoqorets" komandasının hansı güclü tərəfləri "Qarabağ" üçün daha çox problem yarada bilər?
İrəli xəttdə çox sürətli futbolçuları var. Bunu mütləq nəzərə almalıyıq. İlk oyunda da görmüşdük. Çox sərt komandadırlar. Yeri gələndə kobud oynayırlar, yeri gələndə vaxt aparırlar. "Qarabağ" səfərdə belə şeylərə hazır olmalıdır.
- Səncə, Bolqarıstandakı azarkeşlər "Qarabağ"ı necə qarşılayacaqlar? Orada hansı atmosfer gözlənilir?
Açığı, bu barədə heç bir fikrim yoxdur. Düzdür, Razqradda türklər çoxdur. Demək olar ki, hər yerdə onları görə bilərik. Ancaq necə qarşılayacaqlar onu bilmirəm.
- Bolqarıstanda legioner həyatı necə keçir?
Çox yaxşı keçir. Necə deyərlər dolu-dolu (gülür). Hər şey yaxşıdı. Yavaş-yavaş daha da yaxşı olacaq. 4 tur geridə qalıb. İki qələbə, iki məğlubiyyət almışıq. Qarşıda bizi çətin oyunlar gözləyir.
- Bolqarıstanda oynamaq karyerana necə təsir edib?
Əlbəttə, çox böyük təsiri var. Legioner həyatı yaşamağın yalnız futbolçu kimi yox, şəxsi həyata da böyük təsiri olur. Təcrübə qazanırsan. Bu, mənim üçün böyük şansdır. Yaxşı istifadə edib buradan daha böyük liqalara gedə bilərəm. Hər şey qaydasındadır. Bolqarıstanda oynamaq karyerama, həyatıma çox yaxşı təsir göstərir.
- Gələcək karyera planların nədir? Bolqarıstanda qalmaq, yoxsa başqa bir ölkəyə getmək istəyirsən?
Gələcək planlarım var. Amma həyatın bizə nə hazırladığını bilmirik. Ən yaxşısının olacağına ümid edirəm. İstəyirəm ki, daha yaxşı yerlərdə olum. Özümə inanıram. Yüksək səviyyəli klublarda oynaya biləcəyimi düşünürəm. Başqa ölkələrə getmək üçün çalışıram. Hər şey bunun üçündü. Növbəti yay transfer dönəmində yaxşı şeylərə ümid etmək olar.
