"Səbail" küləyi
Azərbaycan futbolunun bugünkü panoraması təkcə meydandakı oyunlarla deyil, həm də meydandan kənardakı qalmaqallarla diqqət çəkir. Xüsusən də, son günlər “Səbail” klubuna yönələn ittihamlar - Şübhəli müqavilələr və maliyyə sirrləri ilə bağlı mübahisələr vəziyyətin nə qədər qarışıq olduğunu göstərir.
Klubun sabiq Müşahidə Şurası üzvü İxtiyar Asyabi ilə hazırkı rəhbərlik arasında yaranan münaqişə bir çox suallar doğurur. Asyabi deyir ki, klubun maliyyə sənədlərində göstərilən xərclər reallıqdan uzaqdır. O, xüsusilə nəqliyyat xərclərinin həddən artıq şişirdildiyini vurğulayır.
Klubdan gələn cavabda bütün bu iddialar “absurd” adlandırılsa da, açıqlamada konkret faktlar təqdim etmək əvəzinə, ümumi təkziblərə üstünlük verilib:
Akademiyanın fəaliyyətini davam etdirdiyi bildirilir, amma bu “fəaliyyətin” detalları açıqlanmır.
Maliyyə məsələlərində şəffaflığın təmin olunduğu bildirilir, amma ictimaiyyətə konkret sənədlər təqdim edilmir. Müqavilələrin tendersiz bağlanması ilə bağlı iddialar isə cavabsız qalıb. Susqunluq təkzibdən daha çox sual doğurur: Gizlədilən nəsə var?
Əgər Asyabinin dedikləri həqiqətə uyğundursa, bu, yalnız “Səbail” üçün deyil, bütün futbol ictimaiyyəti üçün ciddi siqnal olacaq.
Maraqlıdır, klub rəhbərliyi niyə daha konkret açıqlamalar vermir? Niyə Asyabinin iradlarına cavab şəffaflığa əsaslanan sənədlərlə verilmir? Niyə rəhbərlik real faktları paylaşmaqdan çəkinir?
“Səbail” ətrafında yaranan vəziyyət Azərbaycan futbolunun daha dərin problemlərinin göstəricisidir. Klub sadəcə bir qalmaqal mərkəzinə çevrilib və bu vəziyyət ümumi futbol idarəetməsinin qüsurlarını göstərən bir güzgü rolunu oynayır.
Hər iki tərəfin fikirlərini nəzərə alaraq, vəziyyəti tam başa düşmək üçün daha çox fakta və şəffaflığa ehtiyac var. Azərbaycan futbolunun inkişafı üçün belə mübahisələrin şəffaf şəkildə araşdırılması və nəticələrin ictimaiyyətə açıq formada təqdim edilməsi vacibdir. “Səbail”də baş verənlər isə, hələlik, bir çox açılmamış sualı gündəmdə saxlayır.
Azarkeşlərin gözləntisi futbolun inkişafıdır. Lakin belə qalmaqallar bu inamı zəiflədir və cəmiyyətdə “futbol yalnız maraqların oyunudur” qənaətini gücləndirir.
Mirələm Həsənli
