Millimizin hər iki rəqibi uduzdu
UEFA Millətlər Liqasında yığmamızın rəqibləri olan Litva və Lixtenşteyn komandaları növbəti oyunlarını keçirib.
Sportlife.az xəbər verir ki, litvalılar Gürcüstan millisini qəbul edib. Kaunasda keçirilən qarşılaşma gürcülərin 2:0 hesablı qələbəsi ilə başa çatıb. Qonşularımızın heyətində Jorj Mikautadze dubl edib.
Litvalılar 3 gün öncə səfərdə Moldovaya 2:0 hesabı ilə qalib gəlmişdi.
Digər rəqibimiz Lixtenşteyn yığması isə Ruandada keçirilən “FIFA Series” turnirində final görüşünə çıxıb. Həlledici matçda Aruba ilə qarşılaşan avropalılar 1:4 hesabı ilə yenilib.
Xatırladaq ki, milli komandamız Millətlər Liqasında Litva ilə sentyabrın 27-də səfərdə, oktyabrın 4-də isə öz meydanında qarşılaşacaq. Lixtenşteyni oktyabrın 1-də qəbul edib, noyabrın 13-də onlara qonaq olacaq.
